ದ್ರಾವಿಡ ಭಾಷೆಲೆನ ಕುಟುಂಬೊಡು ತುಳು ಒಂಜಿ ಪ್ರಾಕ್‌ದ ಬುಳೆಚ್ಚಿಲ್‌ದ ಭಾಷೆ. ತುಳುವೆರೆನ ಪಾತೆರಕತೆಟ್ಟೆ ದಿಂಜಿದ್‌ ಇತ್ತಿನ ತುಳು ಭಾಷೆ, ಅಕ್‌ಲೆನ ಸಂದಿ ಕಬಿತೊಳೆಡ್, ಗಾದೆ ಎದುರುಕತೆಳೆಡ್, ಉರಲ್ ಕತೆಕ್ಕುಳೆಡ್ ಬಗೆಬಗೆಟ್ ಕೇನ್‌ದ್ ಬತ್ತ್ದ್ಂಡ್. ಆಂಡ ಅವು ಬರವುಡು ತೋಜಿದ್ ಬತ್ತನೆ ಸುಮಾರ್ 150 ವರ್ಷಗು ದುಂಬು ಬಾಸೆಲ್ ಮಿಶನರಿದಕುಲು ತುಳುನಾಡ್‌ಗ್ ಬತ್ತ್ದ್ ತುಳುಕ್ಕೊಂಜಿ ಬರವುದ ಒರುನು ಕೊರಿಬೊಕ್ಕೊನೇ. ಇಂಚ ಬಾಯಿಕೆಬಿತ್ತ ಭಾಷೆ ತುಳು ಬರವುದ ಭಾಷೆ ಆವೊಂದು ಬನ್ನಗ, ಮಾತಾ ಭಾಷೆದ ಲೆಕ್ಕೊನೇ ಅಯಿಳ್ಳಲಾ ಒಂಜಿ ವ್ಯಾಕರಣ ಕಳ್ಕೊಡು ಪಂಡ್‌ದ್ ರೆವರೆಂಡ್ ಜೆ. ಬ್ರಿಜೆಲ್ 1872ಟ್ A Grammar of Tulu Language" ಪನ್ನಿ ತುಳು ವ್ಯಾಕರಣೆ ಬೂಕುನು ಇಂಗ್ಲಿಷ್ಡ್ ಬರೆಯೆರ್. ಅವು ಕರಿದ್ 60 ವರ್ಷಡ್ಸ್ ಬುಕ್ಕೊ ಉಡುಪಿದ ಪಣಿಯಾಡಿ ಶ್ರೀನಿವಾಸ ಉಪಾಧ್ಯಾಯರ್ ತುಳು ಭಾಷೆ ಸಾಹಿತ್ಯದ ಬುಳೆಚಿಲ್ಡ್‌ಗ್ ಬೋಡಾದ್ ತುಳುವ ಸಾಹಿತ್ಯಮಾಲೆ ನ್ ಸುರುಮಲ್ತ್‌ದ್ ಅಯಿಟ್ಸ್ ಆರೇ ಬರೆಯಿನ ತುಳು ವ್ಯಾಕರಣ ಪನ್ನಿ ಬೂಕುನು ತುಳು ಭಾಷೆಡೇ ಬರೆದ್ 1932ಟ್ ಅಚ್ಚಿ ಮಲ್ಪೆರ್. ಅಯಿಡ್ಸ್ ಬೊಕ್ಕ ಪಾಕ ಜನೊ ವಿದ್ವಾಂಸೆರ್ ತುಳು ಭಾಷೆದ ಮಿತ್ತೆ ಕನ್ನಡೊಡು ಬೊಕ್ಕ ಇಂಗ್ಲಿಷ್‌ಡ್ ಬೂಕುಳೆನ್ ಲೇಖನೊಳೆನ್ ಬರೆತ್ತೆರ್. ಭಾಷಾ ವಿಜ್ಞಾನ ಪನ್ನಿನ ವಿಷಯೊ ಭಾಷೆನೇ ಅಧ್ಯಯನ ಮಲ್ಪುನ ಪೊಸ ನಮೂನೆಳೆನ್ ಪಂಡ್‌ದ್ ಕೊರ್ಪುಂಡು. ಅಂಚಾದೇ ವ್ಯಾಕರಣೆನ್ ವಿವರಣಾತ್ಮಕ ಭಾಷಾವಿಜ್ಞಾನೋ ಂದ್ ಪನ್ಸೆರ್.