ಪಾಲಿಟಿಕ್ಸ್ ಒಂದು ಪದವಾಗಿ ಮತ್ತು ಹಾಗೆಯೆ ಒಂದು ಕ್ರಿಯೆಯಾಗಿಯೂ ರಾಜ್ಯ ಮತ್ತು ಸರ್ಕಾರಕ್ಕೆ ಸಂಬಂಧಿಸಿದ ವಿಷಯವಾಗಿದೆ. ಒಂದು ಭೂ ಪ್ರದೇಶವು ರಾಜ್ಯವೆನಿಸಿಕೊಳ್ಳಬೇಕೆಂದರೆ ಅದಕ್ಕೆ ನಾಲ್ಕು ಅಂಶಗಳು ಅಗತ್ಯ. ಅವು ನಿರ್ದಿಷ್ಟ ಪ್ರದೇಶ, ಜನಸಂಖ್ಯೆ, ಸರ್ಕಾರ ಮತ್ತು ಆ ಸರ್ಕಾರಕ್ಕೆ ಪರಮಾಧಿಕಾರ (Sover- eignty). ಈ ನಾಲ್ಕು ಅಂಶಗಳು ಆದಿಕಾಲದ ಅಲೆಮಾರಿ ಮಾನವನು ಒಂದು ನಿರ್ದಿಷ್ಟ ಪ್ರದೇಶದಲ್ಲಿ ತನ್ನ ಕುಟುಂಬದ ಸದಸ್ಯರೊಂದಿಗೆ ವಾಸಿಸಲು ಪ್ರಾರಂಭಿಸಿದಾಗಿನಿಂದಲೂ ಅಸ್ಪಷ್ಟವಾಗಿ ಇದ್ದದ್ದನ್ನು ಕಾಣಬಹುದಿತ್ತು. ಆತನೆ ಕುಟುಂಬದ ಸದಸ್ಯರ ಮೇಲೆಲ್ಲ ಸರ್ವಾಧಿಕಾರವನ್ನು ಹೊಂದಿದವನಾಗಿದ್ದನು. ಅಂತಹ ಕುಟುಂಬಗಳಲ್ಲಿ ರಾಜ್ಯದ ಸಣ್ಣ ಪ್ರಮಾಣದ ಪ್ರತಿ ರೂಪವನ್ನು (Miniature form) ಕಾಣಬಹುದಿತ್ತು. ಈ ವ್ಯವಸ್ಥೆಯೇ ಅನೇಕ ಕುಟುಂಬಗಳು ಒಂದು ಹಳ್ಳಿಯಾಗಿ ಮತ್ತು ಅನಂತರ ಅನೇಕ ಹಳ್ಳಿಗಳು ಒಟ್ಟುಗೂಡಿ ಒಂದು ರಾಜ್ಯವಾಗಿ ಪರಿಣಮಿಸುವವರೆಗೂ ಮುಂದುವರಿಯುತ್ತಾ ಬಂದಿತು. ಈ ಕಾರಣದಿಂದಲೆ ಅರಿಸ್ಟಾಟಲನು ರಾಜ್ಯವು ಕುಟುಂಬಗಳ ಒಂದು ಸಂಯೋಗ (State is a Union of Families) ಎಂದು ಹೇಳಿದ್ದಾನೆ. ಆದಿಕಾಲದಿಂದಲೂ ಒಬ್ಬ ಮುಖ್ಯಸ್ಥನ ಅಥವಾ ಮುಖ್ಯಸ್ಥರ ಅಧಿಕಾರದಡಿಯಲ್ಲಿ ವ್ಯವಸ್ಥಿತ ಜೀವನ ನಡೆಸುವ ಪ್ರವೃತ್ತಿಯು ಕುಟುಂಬಗಳೆಲ್ಲ ಸಂಯೋಗಗೊಂಡು ರಾಜ್ಯವಾಗಿ ರಚನೆಗೊಂಡ ಅನಂತರವೂ ಹಾಗೆಯೇ ಮುಂದುವರಿದುಕೊಂಡು ಬಂದಿದೆ. ಒಂದು ರಾಜ್ಯದಲ್ಲಿ ಒಂದು ಸರ್ಕಾರದ ನಿಯಂತ್ರಣದಡಿಯಲ್ಲಿ ಜೀವಿಸುವುದು ಮನುಷ್ಯರಿಗೆ ಅಗತ್ಯ ಹಾಗೂ ಅನಿವಾರವೂ ಆಗಿದೆ. ಈ ಅರ್ಥದಲ್ಲಿಯೇ ಪಾಲಿಟಿಕ್ಸ್ ಎನ್ನುವ ಪದದ ಆದ್ಯಪ್ರವರ್ತಕ ಗ್ರೀಕ್ ತತ್ವಜ್ಞಾನಿ ಅರಿಸ್ಟಾಟಲ್ 'ಮನುಷ್ಯ ಒಬ್ಬ ರಾಜಕೀಯ ಜೀವಿ' ಎಂದು ಹೇಳಿದ್ದಾನೆ.