ಐಗಳು ಈ ಜಿಲ್ಲೆಯ ಎಲ್ಲ ಪ್ರದೇಶಗಳಲ್ಲಿ ಸುತ್ತಾಡಿ, ಸ್ಥಳೀಯರಾದ ತಿಳುವಳಿಕೆಯುಳ್ಳ `ಹಿರಿಯರಿಂದ ಮಾಹಿತಿಗಳನ್ನು ಸಂಗ್ರಹಿಸಿ, ವಿವೇಚಿಸಿ ವಿವರವಾಗಿ ಬರೆದು ತಿಳಿಸಿರುವುದು ಈ ಗ್ರಂಥದ ಹಿರಿಮೆ. ಈ ಪ್ರದೇಶದ ಹಿಂದಿನ ಕಾಲದ ವ್ಯವಸ್ಥೆಗಳಾಗಿದ್ದ ಸೀಮೆ, ಮಾಗಣೆ, ಗ್ರಾಮಗಳು ಗ್ರಾಮಗಳಲ್ಲಿದ್ದ ಬೀಡು ಗುತ್ತು ಬಾಳಿಕೆಗಳಂತಹ ಆರ್ಥಿಕ - ಸಾಮಾಜಿಕ ವ್ಯವಸ್ಥೆಗಳ ವಿವರಗಳು ನಾನು ತಿಳಿದಂತೆ ಈ ಗ್ರಂಥದಲ್ಲಿ ಮಾತ್ರವೇ ಲಭ್ಯವಿದೆ.

ಇತಿಹಾಸದ ಮೂಲಗಳೆಂದು ಸ್ವೀಕರಿಸಲ್ಪಟ್ಟ ಶಾಸನಗಳು, ನಾಣ್ಯಗಳು ಸಾಂಪ್ರದಾಯಿಕ ಹೇಳಿಕೆಗಳು, ಕಾಗದಪತ್ರ ದಾಖಲೆಗಳು, ಸಮಕಾಲೀನ ಸಾಹಿತ್ಯ ಇತ್ಯಾದಿಗಳಲ್ಲಿ ನಾಣ್ಯಗಳನ್ನು ಹೊರತುಪಡಿಸಿ ಉಳಿದಂತೆ ಎಲ್ಲ ಮೂಲಗಳನ್ನು ಐಗಳು ತಮಗೆ ಲಭ್ಯವಿರುವಂತೆ ಬಳಸಿಕೊಂಡಿದ್ದಾರೆ.

ಈ ಗ್ರಂಥದಲ್ಲಿ ಬಂದಿರುವ ವಿವರಗಳು ಜಿಲ್ಲೆಯ ಸಾಮಾಜಿಕ, ಆರ್ಥಿಕ, ಸಾಂಸ್ಕೃತಿಕ ಇತಿಹಾಸವನ್ನು ನಿರೂಪಿಸಲು ಒಳ್ಳೆಯ ಆಕರಗಳಾಗಿವೆ. ಈಚೆಗಿನ ಸಂಶೋಧಕರು ಐಗಳು ನಿರ್ಧರಿಸಿರುವ ಕಾಲದ ಬಗ್ಗೆ ಮತಭೇದಗಳನ್ನು ಹೊಂದಿದ್ದರೂ ಐಗಳ ವಿವರ ಸಂಗ್ರಹದ ಉಪಯುಕ್ತತೆಯನ್ನು ಪ್ರಶ್ನಿಸಿಲ್ಲ. ಆ ಕಾಲಕ್ಕೆ ಲಭ್ಯವಿದ್ದ ಮೂಲಗಳಿಂದ, ಕ್ಷೇತ್ರಕಾರ್ಯದಿಂದ, ಅರಸುಮನೆತನಗಳ ಹಿರಿಯರಿಂದ ಸಂಗ್ರಹಿಸಿದ ವಿವರಗಳಿಂದ, ತಮ್ಮ ಸ್ವಂತ ಅಧ್ಯಯನ ವಿವೇಚನೆಯಿಂದ ರಚಿಸಿರುವ 'ದಕ್ಷಿಣ ಕನ್ನಡ ಜಿಲ್ಲೆಯ ಪ್ರಾಚೀನ ಇತಿಹಾಸ'ವು ಇಂದಿಗೂ ಒಂದು ಮೌಲಿಕ ಗ್ರಂಥವೆಂಬುದರಲ್ಲಿ ಎರಡು ಮಾತಿಲ್ಲ.

ಮಂಜೇಶ್ವರ ಮುಕುಂದ ಪ್ರಭು