ರೋಶು-ಬಜ್ಪೆಚಿ ನವಿ ಕಾದಂಬರಿ - ಸಾಂಡುನ್ ಘಾಲ್ಲಿ ಶೇಳಿ - ವಾಚುಂಕ್ ಧರ್‌ಲ್ಲಾ ಮ್ಹಾಕಾ, ತಿ ಕಶಿ ಆಕೇರ್ ಜಾಲಿ ಆನಿ ತಿತ್ಲೊ ವೇಳ್ ಕಸೊ ಪಾಶಾರ್ ಜಾಲೊ ಮ್ಹಳ್ಳೆಂಚ್ ಕಳೊಂಕ್‌ನಾ. ಆರಂಬಾ ಥಾವ್ನ್ ಅಂತ್ಯಾ ಪರ್ಯಾಂತ್, ಧರುನ್ ದವರುಂಕ್ ಸಕ್‌ಲ್ಲಿ ಕಾದಂಬರಿ ಮುಣ್ಚ್ಯಾಕ್ ದೋನ್ ಉತ್ರಾಂ ನಾಂತ್.
ಹ್ಯಾ ಕಾದಂಬರಿಚಾ ಪಾನಾನಿ ವಾಳ್ತಾತ್ - ಖಂಚಾಯೀ ಸಮಾಜಿಂತ್ಲಿ ಚಾಲ್ತಿಂ ಘಡಿತಾಂ-ವೊಡಿಲಾಂ-ಕುಟ್ಮಾಚಿಂ-ಸೆಜ್-ಸಾಂಬಾರ್-ಈಷ್ಟ್ , ಹ್ಯಾ ಸರ್ವಾಂ ಮಧೆಂ ಎಕಾ ತರ್ನಟ್ಯಾ ಜೊಡ್ಯಾಚೊ ಸಂಬಂದ್-ವಾದ್-ವಿವಾದ್ ತಶೆಂಚ್ ಎಕಾಮೆಕಾ ಮೊದ್ಲೊ ಬಾಂದ್ ಆನಿ ಸ್ವಾರ್ಥಾಚಿ ತಾಡ್-ವೋಡ್, ಬರಿಚ್ ಪಿಂತ್ರಾಯ್ತಾ. ಆಪ್ಲಾ ಅನುಭವಾನ್, ರೋಶುನ್ ಹ್ಯಾ ಕಾದಂಬರಿಂತ್ಲ್ಯಾ, ಪಾತ್ರದಾರಾಂಕ್, ಜೀವ್ ಭರ್ಲಾ ಆನಿ ಹಿ ತಾಚಿ ಚತುರಾಯ್,ವಾಚ್ಪ್ಯಾಚಿ ಆತುರಾಯ್ ಧರುನ್‌ ದವರ್ಚಾಂತ್ ಸುಫಳ್ ಜಾಲ್ಯಾ ಮ್ಹಣ್ಯೇತ್
ಹರ್ಯೆಕ್ ಪಾನ್ ಪರ್ತಿತಾನಾ, ನವಿಂಚ್ ಘಡಿತಾಂ ಆನಿ ಸನ್ನಿವೇಶಾಂ ವಾಚ್ಪ್ಯಾ ಮುಕಾರ್ ವೇಗಾನ್ ಧಾಂವ್ಚಾ ರಯ್ಲ ಬರಿ ವ್ಹಾಳೊನ್ ಯೆತಾತ್. ತ್ಯಾ ರೈಲಾಚಾ ಹರ್ಯೆಕಾ ಡಬ್ಬಾಂತ್ ಕಿತೆಂ ಆಸಾಗಾಯ್ ಮ್ಹಳ್ಳಿ ಆತುರಾಯ್, ವಾಚ್ಪ್ಯಾಚಾ ಮತಿಂತ್ ಆಪಾಪಿಂಚ್ ಉಬ್ಜತಾ. ಹರ್ಯೆಕಾ ಸನ್ನಿವೇಶಾಂತ್ ಸ್ವಾಭಾವಿಕತಾ ಆಸಾ, ಆನಿ ಹಿ ಶೈಲಿ, ವಾಚ್ಪ್ಯಾಚಾ ಉಬ್ಬಣೆಕ್ ವಾಟ್ ದೀನಾ. ಕೊಂಕ್ಣಿತ್ ಆಜ್-ಕಾಲ್ ವಾಪರ್ಚೆ ಜಾಯಿತ್ತೆ ಇಂಗ್ಲಿಷ್ ಸಬ್ದ್, ಬೊರಯ್ಣರಾನ್ ಬಾರ್ಯಾಚ್ ಚಲಾಕೆನ್ ವಾಪರ್ಲ್ಯಾತ್ ಜಾಲ್ಲ್ಯಾನ್, ವಾಸ್ಪ್ಯಾಕ್ ಆಪುಣ್ ಆಪ್ಲಾಚಾ ಸದಾಂಚಾ ಭಾಶೆನ್ ವಾಚುನ್ ಆಸಾಂ ಮ್ಹಣ್ ಬೊಗ್ಚಾಂತ್ ನವಾಲ್ ನಾ.
ಕಥಾ ವಾಚುನ್ ಸಂಪ್ತಾನಾ, ಹಿ ಫಕತ್ ಕಥಾ ನ್ಹಯ್, ನೀಜ್ ಘಡಿತ್ ಮ್ಹಳ್ಳೆಬರಿ ಬೊಗ್ತಾ. ನಿರಂತರ್ ವ್ಹಾಳ್ವೆಂ ನಿರೂಪಣ್, ಸ್ವಾಭಾವಿಕ್ ಸನ್ನಿವೇಶಾಂ ಆನಿ ಸುಲಭಾಯೆನ್ ವ್ಹಾಳ್ಚೊ ಸಂವಾದ್, ಹ್ಯಾ ಕಾದಂಬರಿಕ್ ಉಂಚ್ಲೊ ಸುವಾದ್ ದಿತಾ ಮ್ಹುಣ್ಯೆತ್ . ಹೆಂ ಪುಸ್ತಕ್ ಘೆವ್ನ್ ವಾಚ್‌ಲ್ಲ್ಯಾಂಕ್, ಖಂಡಿತ್ ತ್ರಪ್ತಿ ಜಾತೆಲಿ ಮ್ಹಣ್ ಮ್ಹಾಕಾ ಭಗ್ತಾ.
ಮ್ಹಜಿಂ ದೋನ್ ಉತ್ರಾಂ ಸಂಪಂವ್ಚ ಪಯ್ಲೆಂ, ರೋಶು ಬಜ್ಪೆ ಥಾವ್ನ್ ನವ್ಯಾ ನವ್ಯಾ ಸಂಗ್ತಿಂಚೆರ್ ಮಾಂಡುನ್ ಹಾಡ್‌ಲ್ಲಿಂ ಜಾಯಿತ್ತಿಂ ನವಿಂ ಪುಸ್ತಕಾಂ ಫಾಯ್ಸ್ ಜಾಂವ್ದಿತ್ ಮ್ಹಣ್ ಆಶೆಂವ್ವಾ ಸಂವೆಂ, ತಾಚಾ ಲಿಕ್ಣೆಕ್ ಸರ್ವ್ ಬರೆಂ ಮಾಗ್ತಾಂ.

ಸುನಂದ್