ಬಂಟರು ಕರ್ನಾಟಕದ ಕರಾವಳಿ ಜಿಲ್ಲೆಗಳಾದ ದಕ್ಷಿಣ ಕನ್ನಡ ಮತ್ತು ಉಡುಪಿ ಜಿಲ್ಲೆಗಳಲ್ಲಿ ವಾಸಿಸುತ್ತಿರುವ ಪ್ರಮುಖ ಜಾತಿ ಸಮುದಾಯಕ್ಕೆ ಸೇರಿದವರು. ಕೃಷಿಕರು, ಉದ್ಯಮಶೀಲರು ಮತ್ತು ಸಂಘಟನಾ ಚತುರರೂ ಆದ ಇವರ ಆಚಾರ-ವಿಚಾರ, ಸಂಸ್ಕೃತಿ, ಕೌಟುಂಬಿಕ ಪದ್ಧತಿ ಮುಂತಾದವುಗಳು ವಿಶಿಷ್ಟವಾಗಿದ್ದು, ನನ್ನ ಕುತೂಹಲವನ್ನು ಕೆರಳಿಸಿ ಅವುಗಳ ಅಧ್ಯಯನಕ್ಕೆ ಪ್ರೇರೇಪಿಸಿವೆ. ಬಂಟರ ಬದಲಾಗುತ್ತಿರುವ ಸಾಮಾಜಿಕ- ಸಾಂಸ್ಕೃತಿಕ ಸ್ಥಿತಿಗತಿಗಳನ್ನು ಐದು ವರ್ಷಗಳ ಕಾಲ ಅಧ್ಯಯನ ಮಾಡಿ 2006ರಲ್ಲಿ ಕುವೆಂಪು ವಿಶ್ವವಿದ್ಯಾನಿಲಯಕ್ಕೆ ಸಂಶೋಧನಾ ಮಹಾಪ್ರಬಂಧದ ರೂಪದಲ್ಲಿ ಸಲ್ಲಿಸಿದ ಕೃತಿ ರೂಪವಿದು.

ಬದಲಾವಣೆ ಎಂಬುದು ನಿಸರ್ಗನಿಯಮ. ಬದಲಾವಣೆ ರಹಿತ ಸಮಾಜವನ್ನು ಊಹಿಸುವುದು ಸಾಧ್ಯವಿಲ್ಲ. ಬಹಳ ಸಾಂಪ್ರದಾಯಿಕವೆಂದು ಕರೆಯಲ್ಪಡುವ ಸಮಾಜಗಳು ಮತ್ತು ಸಂಸ್ಕೃತಿಗಳು ಕೂಡ ಬದಲಾವಣೆಯ ಪ್ರಕ್ರಿಯೆಗೆ ಒಳಗಾಗಿವೆ. ಬಂಟರು ತಮ್ಮ ಸಾಮಾಜಿಕ ಪದ್ಧತಿ, ಸಂಸ್ಕೃತಿ, ಧಾರ್ಮಿಕ ಆಚರಣೆಗಳನ್ನು ಈಗಲೂ ಮುಂದುವರೆಸಿ ಕೊಂಡು ಹೋಗುತ್ತಿದ್ದರೂ ಅವುಗಳಲ್ಲಿ ಅನೇಕ ಬದಲಾವಣೆಗಳಾಗಿವೆ. ಅವರ ಅಳಿಯಕಟ್ಟು ಕುಟುಂಬ ಪದ್ಧತಿ, ವಿವಾಹ, ಆರಾಧನೆಗಳು, ಕುಲೆಮಧ್ಯೆ (ಪ್ರೇತ ವಿವಾಹ), ಕಂಬಳ, ಕೋಳಿ ಅಂಕ, ಹುಟ್ಟಿನಿಂದ ಸಾವಿನವರೆಗೆ ನಡೆಯುವ ಸಂಸ್ಕಾರಗಳಲ್ಲಿ ಸಾಕಷ್ಟು ಬದಲಾವಣೆ ಗಳಾಗಿವೆ. ಆದರೆ ಈ ಬದಲಾವಣೆಯ ಪ್ರಮಾಣದಲ್ಲಿ ಗ್ರಾಮ-ನಗರಗಳ ನಡುವೆ ವ್ಯತ್ಯಾಸಗಳಿವೆ. ಈ ಎಲ್ಲಾ ಅಂಶಗಳ ಬಗ್ಗೆಯೂ ಸಂಶೋಧನೆಯಲ್ಲಿ ಗಮನಹರಿಸಿದ್ದರೂ, ಕೂಲಂಕುಷವಾದ ವಿವರಣೆಗಳನ್ನು ನೀಡಲು ಸಾಧ್ಯವಾಗಿಲ್ಲ. ಕಾರಣ ಇದೊಂದು ಸಮಯಾಧಾರಿತ ಮತ್ತು ನಿರ್ದಿಷ್ಟ ಉದ್ದೇಶಗಳನ್ನು ಹೊಂದಿರುವ ಅಧ್ಯಯನವಾಗಿದೆ.

ಪರಿವಿಡಿ
1. ಪ್ರಸ್ತಾವನೆ
2. ಬದಲಾಗುತ್ತಿರುವ ಸ್ಥಿತಿಗತಿಗಳು
3. ಜೀವನ ಮತ್ತು ವ್ಯಕ್ತಿತ್ವ
4. ಸಾಮಾಜಿಕ - ಶೈಕ್ಷಣಿಕ ಬದುಕು
5. ಸಾಂಸ್ಕೃತಿಕ - ಧಾರ್ಮಿಕ ಜೀವನ
6. ಆರ್ಥಿಕ ರಾಜಕೀಯ ಸ್ಥಿತಿಗತಿಗಳು
7. ಉಪಸಂಹಾರ
8. ಅನುಬಂಧಗಳು