ಭಾರತದ ಇತಿಹಾಸ ರಚನಾಶಾಸ್ತ್ರದ ಇತಿಹಾಸದಲ್ಲಿ ಮೆಕೆಂಝಿಗೆ ಒಂದು ಮಹತ್ವದ ಸ್ಥಾನವಿದೆ. ಆತನು ಸಂಗ್ರಹಿಸಿದ ಅಪಾರ ಸಂಖ್ಯೆಯ ಕೈಫಿಯತ್ತುಗಳು ಇತಿಹಾಸ ರಚನೆಗೆ ಅಮೂಲ್ಯವಾದ ಆಧಾರಗಳಾಗಿವೆ. 19ನೆಯ ಶತಮಾನದಲ್ಲಿ ಈತ ಭಾರತದ ಅನೇಕ ಭಾಗಗಳಲ್ಲಿ ಸಂಚರಿಸಿ ಸ್ಥಳೀಯ ಇತಿಹಾಸಕ್ಕೆ ಸಂಬಂಧಿಸಿದ ದಾಖಲೆ, ವಸ್ತು ಇತ್ಯಾದಿಗಳನ್ನು ಸಂಗ್ರಹಿಸಲು ಪ್ರಾರಂಭಿಸಿದಾಗ ಇತಿಹಾಸ ರಚನೆಯ ಒಂದು ಹೊಸ ಯುಗ ಆರಂಭವಾಯಿತು. ಮೆಕೆಂಝಿಯ ಸಂಗ್ರಹ ಎಷ್ಟು ಉಪಯುಕ್ತವೋ ಅಷ್ಟೆ ಸಮಸ್ಯಾತ್ಮಕವಾದುದು. ಅದನ್ನು ವ್ಯಾಖ್ಯಾನಿಸುವುದು ಸುಲಭದ ಕಾರ್ಯವಲ್ಲ, ಅದೊಂದು ಕಠಿಣ ಸವಾಲು. 18ನೇ ಶತಮಾನದ ಭಾಷೆ, ಆಗ ಬಳಕೆಯಲ್ಲಿದ್ದ ರೆವಿನ್ಯೂ ಪರಿಭಾಷಿಕ ಶಬ್ದಗಳನ್ನು ವ್ಯಾಖ್ಯಾನಿಸುವುದು ಬಹು ಕಷ್ಟಕರವಾದ ಕೆಲಸವೇ ಸರಿ.